पावसाचे गाणे

तसे पावसाचे गाणे ,

सोपे साधे नि सरळ ,

नाही पेचदार ताना

तरी जीवाला भुरळ

आधी विलंबित ठेका

होई सावकाश द्रुत

घुमे दिशांच्या कानांत

चिंब धारांचे संगीत .

घन झरे सूर धारा ,

झाला तानपुरा वारा

नाद कण कण पारा ,

खेळे तनात,मनात

नको मल्हाराचा शिक्का

पावसाच्या गाण्यावर ,

शास्त्र व्यापूनि उरले 

लय सूर पाण्यावर

अंती पावली भैरवी

धुंद माती गंधाळली .

सुखावून त्या पानांनी ,

टिपे लोचनी गाळली .

असे पावसाचे गाणे ,

कसे सोपे नि सरळ .

परी थरारली सृष्टी

गळे सारी मरगळ