स्वागत

क्रूर काटे ,पदर काही

त्यांस लागून फाटले

पण दुधारी खडग हाती

भय न त्याचे वाटले

रास्त शंका कोकिळेची

आम्रतरु ना दाटले

संपले सरले ऋतू ,

त्या कावळ्यांना वाटले

मोजक्या बछड्यांसवे ती

दूर वाघीण चालली

श्वान मिळुनी भुंकले

त्या राज्य आले वाटले

लाल भगव्या रक्तिम्याची

रेखिली ज्यांनी चिरी

ध्यास वेड्या वादळाचे ,

श्वास घुमणारे उरी

त्या गुहांतून सिंहिणींच्या ,

रानछावे  वाढती

बाललीला बघुनी त्यांची

दृष्ट झाडे काढती.

या धरेवर स्वागतांची ,

तीच मंगल तोरणे

सिंह येतील ,शांत होतील

जम्बुकांची गायने.