प्रेम

तिच्याचसाठी कितीक तयाने ,लिहिल्या असतील प्रेम कविता,

चंद्र चांदणे,हिरवळ,पाऊस,असतील थकले गाता गाता.

परी अनामिक होती हुरहूर, ऊन पावसाच्या  खेळांची.

सहवासातून सलज्ज सुमने ,होता नेत्रीं मौंन कळ्यांची .

------------------------

आता तनांच्या आवेगातच ,चंद्र मनांचे क्षितिजी बुडती,

तरल क्षणांची लाज पाखरे ,मिटुनी डोळे,भिऊन उडती.

बेफिकीरांच्या उठवळ गाथा,तनामनांच्या या निरगाठी!.

सुटणे अवघड,नशिबी तुटणे!फुटकी नाती घेऊन पाठी.