जात

संन्याशाची पोरे, त्यांना मिळे शेणभिक्षा

सोनखत केले ,फळ अमृताचे वृक्षा .

तापलेल्या वाळूतले, उचलले तान्हे ,

भ्रष्ट झाले नाथ ऐसे भुंकलीत श्वाने.

तरी केले तेच ,वाटे सत्य हृदयाला ,

जनार्दन धाला, दत्त द्वारपाल झाला .

जाती जाती मध्ये ज्यांनी विभागले संत ,

बगळ्यांचे वेष ,त्यांचे लांडग्याचे पन्थ .

नामदेव शिंप्यांचेच ,सावता माळ्यांचा?

अर्थ उलटाच केला संतांच्या मेळ्याचा .

पहा उघडून डोळे ,शुद्ध हे लबाड ,

जाती वंत चोर ,मनि मतांचे घबाड .

आम्हा बडव्यांचे काय ?

फक्त हवे पाय.

विठ्ठलाची जात काढे

कोण व्याली माय ?