सुईबाई शिरल्या
शर्टाच्या धाग्यात!
नेढ्यात दोरा ,
ओवून त्राग्यात!
आतबाहेर,बाहेर आत
करून काही वेळ,
तुटलेल्या बटणाचा
काजेशी मेळ!
काय बाई माझ्या
कामाच्या वाटा!
काढायचा आहे
पायातला काटा!
घालून पक्की गाठ,
फिरवून आपली पाठ,
म्हणाल्या आता "येते",
पडेल अवचित गाठ!..
दाभणताई गोधडीत
अश्श्या काय घुसल्या,
पाच टीपा एकदम
घालून स्वस्थ बसल्या.
ठिगळ ठिगळ जोडून
गोधडीत ऊब भरीन
म्हणतात,अंग मोडून
शिवण टांचण करीन...
राजसबाळ्या क्रोशाच्या
सुबक लांब सुया,
स्वेटर,मफलर लोकरकाम!
थंडी आली बया!
बाळासाठी पायमोजे,
किंवा छान टोपी,
मऊमऊ घालून कसं
बाळ जाईल झोपी...
अस्सा आमचा सुई वंश
जन्म शिवण्यासाठी,
लागली गरज हाक मारा,
सज्ज सेवेसाठी!
.🍃संतोष
No comments:
Post a Comment