तोरणे लावा सख्यांनो
आज माझा क्रुष्ण येतो,
विरहवीणा शांत करण्या
बांसुरीचा नाद येतो.
हांसता का बालिकांनो
क्रुष्ण काळा हा म्हणोनि?
देखणा,लावण्यखाणी
राजसांचा राव येतो.
मोकळ्या केसांत माझ्या,
दोन बकुळीची फुले.
नीलकमळांचा तयांना
माळण्या श्रुंगार येतो.
जीर्ण माझे कांबळे
अन् चंद्रमौळी झोपडी.
भरजरी पितांबराचा
मोरपंखी साज येतो.
कुरुप कुब्जा,सुरुप राधा
राजकन्या रुक्मिणी!
भावना जो फक्त पाही
प्रेमळांचा प्राण येतो.
क्षुद्र मी कण मातीचा
व्याकुळल्या वाटेवरी
सावळा पदस्पर्श करण्या
सावळा घनश्याम येतो.
.🍃संतोष
No comments:
Post a Comment