(१)
खंवलेल्या खोबऱ्यासोबत
गूळ आला शिजून,
एकजीव सारण झालं
मुरलं पाकात भिजून.
तांदळाच्या उकडीची
पांढरीशुभ्र पारी,
पुढील सारं कसबीचं
पाहिजे तयारी!
पारीच्या पोटामध्ये
सारण भर नीट
चिमूटचुण्या पाडून काठ
अलगद वर मिट.
अंगभर वाफ घेऊन
नाही पाहिजे हसला,
मग मात्र जाऊन थेट
बाप्पापुढे बसला.
नारळाचं दूध गोड
वरती साजूक तूप
नैवेद्याच्या ताटामध्ये
याचंच अप्रूप.
.🍃संतोष
ओळखा पाहू:-
वाटून घाटून मसाला,
केली खमंग आमटी.
कणीक मळून जाडसर
लाटी लाटली मोठी.
आडव्या उभ्या सरी पाडून
सुट्या पाळ्या काढा.
आमटीत सोडून शिजवा मस्त,
गरम गरम वाढा.
वरतून जरा तूप आणि
लिंबू पिळा ताजा,
नेहमीच्या स्वयंपाकाला
आज थोडी रजा!
.🍃संतोष
ओळखा पाहू:-
कांद्याच्या पाकळ्यांना
चोळा तिखटमीठ,
चुरडलेला ओवा,घोळा
घालून बेसन पीठ.
कडक तापल्या तेलात
सोडा गोळे हळू,
वास खमंग सुटताच,
लागेल सर्वां कळू.
तळलेली मिरची
सोबतीला बरी,
वाफाळलेला चहा,
आणि पावसाच्या सरी!
.🍃संतोष
ओळखा पाहू:-
कुरकुरीत चिरमुरे,
चुरचुरीत फोडणी.
शेंगदाणे,कढिपत्ता
अशी सर्व जोडणी.
तिखटमीठ पिठीसाखर
जमली चव मस्त,
कांदा,लिंबू,कोथिंबीर
घालून करू फस्त!
खाऊ खाऊन खुसखुशीत
बाळ आला खुशीत!
आजी म्हणे,'भरते डबा,
काढून देते बशीत!'
.🍃संतोष
No comments:
Post a Comment