भाजीवाल्या मावशींच्या
डोक्यावर पाटी!
काय काय भाजीपाला
कुणा कुणासाठी?
आजीसाठी लाल माठ
आणि पालक,अळू,
पालेभाजी हवीच,म्हणते
अळूवड्याही तळू.
तिखट तिखट
मिरच्या हिरव्या,
आजोबांना हव्या,
लोणच्यासाठी आणून देतो
म्हणती बरण्या नव्या.
बाबा घेतात कोबी फ्लॉवर
डब्यात भाजीसाठी,
ताई घेई छोटी वांगी
भरून करण्यासाठी.
भेंडी पडवळ,कडू कारली
आई सगळं घेते,
कोथिंबीर कडीपत्ता लिंबू
आले जरासे नेते.
मला आवडे लाल टमाटा,
आणि गाजर गोड,
देते आई चिरता चिरता
हळूच खाया फोड.
.🍃संतोष
No comments:
Post a Comment