पक्ष्यांचे गाणे(बालकविता)

चिमणीच्या चोचीमध्ये, 

तीन चार दाणे,

कबूतर गोरे गोरे

भरते बकाणे,

कावळ्याचे गाणे 

कसे भसाडे बेसूर.

कोकीळ लपून

त्याला शिकवतो सूर.

लाल लाल चोचीमध्ये

गोड गोड पेरू,

पोपटाचे पिल्लू कसे

बोले चुरूचुरू.

फदक,फदक,बदक आले,

चपटी चोचवाले,

पाण्यामध्ये पोहताना

पाय कुठे गेले?

मोर आला लांब लांब

ओढत पिसारा,

फुलवताना निळाभोर!

राजावाणी तोरा.

गुलगुल बोलत बुलबुल आले

भिरभिर शिंजीर करी.

चोचीवरती चोच चढवून

धनेश फांदीवरी.

वटवट्याची अखंड वटवट,

सुतार ठकठक करी,

कोतवाल हा फेरी मारे

गगनी वरचेवरी.

सगळे पक्षी आले आणि,

नाचून नाचून गेले.

मुलांसाठी एक एक पीस

बक्षीस ठेवून गेले..

                                    .🍃संतोष