फुलपाखरू

आज तिचा दिवस,म्हणून
काढली उसनी आठवण.

पदर डोई,नजरेत भुई,
अशीच 'स्मृती' साठवण.

सतीत्वाचे जीर्ण पट,
पुराणांचे जुने मठ,

कहाण्यांतले गळके घट,
दिसली नाही तिथं.

तुटक्या बेड्या कुरवाळणारी,
उरली ओशाळ भुतं.

घर,दार,परस,अंगण,
भरुन तिचेच श्वास,

माजघरातून उंबरठ्याचे
आखलेले प्रवास.

दिसली नाही, तसा झाला
अहंकार जागा,

भित्रं माझं मन!,
तिच्या सुरक्षेचा त्रागा.

कोषांत मऊ नात्यांच्या मग,
शोधू लागलो धागे,

वाटले की ती भेटणारच
इथं आगे मागे.

कोष म्हणाले,पुरे आता,
नको व्यर्थ झुरु..

वर बघ ,झालंय कसं,
तिचं फुलपाखरू...

           .🍃संतोष