आई,आजी,ताई म्हणते,
बाहेर नको जाऊस!
मला सांग बाबा,येतो,
कुठुन बरं पाऊस?
खरंच का रे ढगामधे,
दळत असते म्हातारी?
एवढं पाणी येतं कसं
कोण धरी वरती झारी?
गोष्ट सांगतो ये इकडे,
'पाऊस खाली कसा पडे!'
ऊन लागता वाफ बने,
समुद्रातल्या पाण्याची
उंच ढगांच्या कुशीत तिजला,
जागा मिळते राहाण्याची,
हळूहळू ते ढग पळती
वाऱ्याच्या गाडीवरती,
हिरवी झाडे अन् डोंगर,
पळताना त्यांना धरती.
थंडी लागता उंच तिथे
ढगांतून मग पाणी पडे,
असा येतसे पाऊस हा,
इथे तिथे जिकडे तिकडे,
ढगास आदळून ढग कधी,
चकमक जोराची उडते,
तोच येई,आवाज धुडुम्
वीजबाई ती कडाडते.
गोष्ट अशी ही छोटीशी
ढग,पाऊस,वाऱ्याची!
शोधून बघता सापडती
अशी उत्तरे साऱ्यांची.
.🍃संतोष
